زکوۃ کی رقم دارالعلوم میں صرف کرنے کےلئے کیا حیلئہ شرعی ضرور ی ہے

سوال
السلام علیکم و رحمت اللہ وبرکاتہ
 کیا فرماتے ہیں علمائے کرام ومفتیان عظام
 مندرجہ ذیل مسائل کے بارے میں
 ( الف) زکوۃ کی رقم دارالعلوم میں صرف کرنے کےلئے ۔کیا حیلئہ شرعی ضرور ی ہے؟
 (ب) اس حیلۂ شرعی کی حکمت کیا ہے

1. (ج) زید کا کہناہے کہ کسی فقیر ومسکین کے ہاتھ سے حیلئہ شرعی کرنےکے بجائے کیوں نہ ہم خود طالب علم یا ا ن کے والد کے ہاتھ زکوۃ کی رقم تھما دیں دریافت امر یہ ہےکہ کیا زید کا قول درست ہے؟

کیا اسطرح زکوۃ ادا ہوجائے گی؟ قرآن وحدیث کی کی روشنی میں جواب عنایت فرمائیں مہربانی ہوگی
  المستفتی ۔ محمد حضیرالدین مصباحی
 ناظم اعلی دارالعلوم اہل سنت انوار مصطفی شاہ پورا گوگاواں ضلع کھرگون  مدھیہ پردیش

وعلیکم السلام ورحمۃ اللہ وبرکاتہ
 (الف) صورت مستفسرہ میں زکوٰۃ کی رقم دارالعلوم میں خرچ کرنے کے لئے حیلہ شرعی ضروری ہے اگر بغیر حیلہ شرعی کے خرچ کی گئی تو زکوٰۃ ادا نہ ہوگی کیونکہ ادائگی زکوٰۃ میں تملیک فقیر شرط ہے جو کہ بغیر حیلہ شرعی کے مفقود ہو گی
 علامہ جلال الدین امجدی علیہ الرحمہ فرماتے ہیں
 زکوٰۃ و فطرہ کی رقم کو براہ راست مدرسہ کی تعمیر یا مدرسین کی تنخواہ میں صرف کرنا جائز نہیں اس لئے کہ زکوٰۃ و فطرہ کی ادائگی میں تملیک شرط ہے اور ان صورتوں میں تملیک نہیں پائی جاتی
(فتاویٰ فیض الرسول ج ١ ص ٤٩)
صدر الشریعہ علیہ الرحمہ فرماتے ہیں
 بغیر تملیک کے زکوٰۃ ادا نہیں ہو سکتی
پھر تحریر فرمایا
بہت سے لوگ مال زکوٰۃ اسلامی مدارس میں بھیج دیتے ہیں ان کو چاہیے کہ وہ متولی مدرسہ کو اطلاع دیں کہ یہ مال زکوٰۃ ہے تاکہ متولی مال کو جدا رکھے اور مال میں نہ ملائے اور غریب طلبہ پر صرف کرے کسی کام کی اجرت میں نہ دے ورنہ زکوٰۃ ادا نہ ہوگی
(بہار شریعت ج 1 ح 5 زکوٰۃ کا بیان)
(ب) حیلہ شرعی کی حکمت یہ ہے کہ زکوٰۃ کی رقم مستحقین تک پہنچ جائے پھر وہ جس کام میں چاہیں خرچ کریں
 (ج) اگر طالب علم یا اس کے والد فقیر شرعی ہوں تو وہ بھی حیلہ شرعی کر سکتے ہیں ورنہ نہیں کیوں کہ تملیک فقیر شرط ہے
(عامہ کتب فقہ)

واللہ ورسولہ اعلم بالصواب
محمد ذیشان مصباحی غفرلہ